តើការធ្វើការងារក្នុងពេលកំពុងសិក្សា មានគុណសម្បត្តិនិងគុណវិបត្តិអ្វីខ្លះ?
តើការធ្វើការងារក្នុងពេលកំពុងសិក្សា មានគុណសម្បត្តិនិងគុណវិបត្តិអ្វីខ្លះ?
តើអ្នកធ្លាប់បានសម្រេចចិត្ត ឬមានបំណងចង់ស្វែងរកការងារធ្វើ
ខណៈពេលអ្នកកំពុងរៀននៅសាកលវិទ្យាល័យដែរទេ? តើអ្នកគិតថា៖ “ការធ្វើការងារ ក្នុងពេលកំពុងសិក្សាវាធ្វើឲ្យប៉ះពាល់ដល់ការសិក្សាឬទេ”? តើការធ្វើការងារក្នុងខណៈពេលអ្នកកំពុងសិក្សាជួយអ្នក ឲ្យទទួលបានគុណសម្បតិ្តអ្វីខ្លះ? តើអ្នកចង់ធ្វើការងារផង និងសិក្សាផងទេ? តើអ្នកសម្រេចចិត្តយ៉ាងណាដែរ? បើសិនអ្នកមិនទាន់សម្រេចចិត្តច្បាស់លាស់នៅឡើយ អ្នកត្រូវគិតទៅលើចំណុចមួយចំនួន ដែលចំាបាច់សម្រាប់ធ្វើការពិចារណា និងវិនិច្ឆ័យ។ ចំណុចខាងក្រោមនេះ នឹងរៀបរាប់ពីគុណសម្បតិ្ត និងគុណវិបត្តិមួយចំនួនពេលអ្នកមានការងារធ្វើស្របពេលកំពុងរៀន ។
គុណសម្បតិ្ត
· អ្នកនឹងអាចរកប្រាក់ចំណូលបានដោយខ្លួនឯង។ អ្នកអាចប្រើប្រាក់ អ្នករកបានទៅចំណាយលើអ្វីៗគ្រប់បែបយ៉ាង ដែលអ្នកត្រូវការកំឡុងពេលសិក្សា ព្រមទាំងអាចសន្សំទុកសម្រាប់ពេលអនាគតទៀតផង។ លើសពីនេះទៅទៀត អ្នកអាចមានសមត្ថភាពចំណាយលើការបង់ប្រាក់សាលាដោយខ្លួនឯងផង ដែរ។ បើអ្នករកប្រាក់បានកាន់តែច្រើន នោះការចំណាយលើការសិក្សាក៏គ្មានបញ្ហាអ្វីដែរ។
· អ្នកនឹងមានផ្នត់គំនិតល្អ (វិជ្ជមាន) ក្នុងការឲ្យតម្លៃខ្លួនឯង។ ពេលអ្នកមានការងារធ្វើ អ្នកនឹងមានអារម្មណ៍វិជ្ជមាន មានការគោរព និងគិតថា៖ “ខ្លួនឯងមានតម្លៃ”។
· វាអាចមានផលវិជ្ជមានដល់អាជីពខ្លួនឯងនាពេលអនាគត។ ពេលអ្នកមានការងារធ្វើ វាអាចជួយអ្នកពង្រឹងនូវជំនាញរបស់អ្នក ឲ្យកាន់តែប្រសើរឡើង។
· វាអាចជួយអ្នកឲ្យមានការរីកចម្រើន និងចេះនូវកិច្ចការផ្សេងៗជាច្រើន។
· វាអាចជួយអ្នកឲ្យមានគំនិតម្ចាស់ការលើខ្លួនឯង។ ចំណុចនេះចង់មានន័យថា៖ “អ្នកមានសមត្ថភាពអាចរកលុយដោយខ្លួនឯង ដោយអ្នកមិនចាំបាច់ពឹងផ្នែកលើអ្នកណាឡើយ”។
· តាមរយៈគុណសម្បត្តិខាងលើ អ្នកគួរតែសម្រេចចិត្តធ្វើការ និងសិក្សានៅពេលដំណាលគ្នា ពីព្រោះ វាជាយុទ្ធសាស្ត្រមួយ អាចទទួលបានលទ្ធផលពីរក្នុងពេលតែមួយ “ព្រួញមួយបាញ់បានសត្វពីរ”។
· យល់ដឹងពីសង្គមបានច្រើនតាមរយៈការប្រឡូកចូលក្នុងវិស័យការងារ។
· ទទួលបានបរិញ្ញាបត្រ ដោយសារតែអ្នកបានរៀនចប់នឹងប្រឡងជាប់គ្រប់មុខវិជ្ជាទាំងអស់នៃ ការសិក្សា ហើយមិនត្រឹមតែប៉ុណ្ណោះ អ្នកនឹងមានបទពិសោធន៍ការងារគ្រប់គ្រាន់។
· ពេលអ្នកនិយាយទៅកាន់ចៅហ្វាយរបស់អ្នកពីបញ្ហាសិក្សា គាត់នឹងឈ្វេងយល់ពីអ្នក ហើយនឹងមានការអធ្យាស្រ័យឲ្យអ្នក ជាពិសេសពេលមានករណីចាំបាច់។
· មានបទពិសោធន៍ការងារច្រើន។
គុណវិបត្តិ
· អ្នកនឹងមានបញ្ហាលើការបែងចែក និងគ្រប់គ្រងពេលវេលាឲ្យបានត្រឹមត្រូវ។ បើអ្នកមានការងារធ្វើ អ្នកប្រាកដជាមានពេលវេលាតិចណាស់សម្រាប់រៀនខ្លួនឯង ព្រមទាំងធ្វើអ្វីផ្សេងទៀតដែលអ្នកចង់ធ្វើ។
· វាអាចមានការប៉ះពាល់ដល់ពេលសិក្សា ជាពិសេស ពេលអ្នកមានការងារធ្វើពេញម៉ោង។ ដើម្បីជៀសវាងការប៉ះពាល់បែបនេះ អ្នកគួរតែទៅធ្វើការតែពេលអ្នកទំនេរពីការសិក្សាតែប៉ុណ្ណោះ។
· គ្មានពេលវេលាសម្រាប់រៀនសូត្រ។ បន្ទាប់ពីធ្វើការពេលថ្ងៃនឿយហត់ និងអស់កម្លាំង លុះពេលយប់ គឺមិនមានថាមពលនឹងរៀននោះឡើយ។ មិនត្រឹមតែប៉ុណ្ណោះ ពួកគេមិនបានប្រមូលអារម្មណ៍ក្នុងការសិក្សាទាំងស្រុងនោះទេ ដោយសារតែ គេគិតតែចង់មានពេលសម្រាកខ្លះ ហើយពេលខ្លះគេអាច និងគេងលក់ក្នុងថ្នាក់ក៏មាន។
· ប្រាក់ដែលអ្នករកបាន គឺវាមិនបានច្រើនប៉ុន្មានឡើយ ដោយសារតែអ្នកមិនមានពេលគ្រប់គ្រាន់ក្នុងការបំពេញការងារឲ្យគេ ហើយប្រាក់កម្រៃដែលរកបាន គឺអាស្រ័យលើពេលវេលាធ្វើការឲ្យគេ។
ការសិក្សាដែលគិតតែសិក្សាតែមួយមុខ នឹងទទួលបានលទ្ធផលល្អ ជាងការដែលធ្វើការ បណ្តើរ និងសិក្សាបណ្តើរ។
អំពីអ្នកនិពន្ធ
Admin
ខ្ញុំបាទ ផាន់ ចាន់រិទ្ធី ជានាយកមជ្ឈមណ្ឌល ម៉ាយស្កូល សូមទទួលនូវរាល់មតិកែលំអរទាំងឡាយណាដែលកើតមានឡើង ឬក៏ចំនុចខ្វះខាត សំណូមពរនានា ឬក៏ចង់បំពេញបន្ថែមដើម្បីឲ្យទំព័រមួយនេះមានភាពល្អប្រសើរឡើង។សូមអរគុណ
0 សេចក្តីអធិប្បាយ:
Note: Only a member of this blog may post a comment.