វិធីសាស្ត្រធ្វើឲ្យចៅហ្វាយសប្បាយចិត្ត
វិធីសាស្ត្រធ្វើឲ្យចៅហ្វាយសប្បាយចិត្ត ក្នុងនាមជាបុគ្គលិកគ្រប់រូប អ្នកចាំបាច់ ត្រូវតែចេះរិះរកវិធីណាមួយដែលសមស្រប ក្នុងការបង្កបរិយាកាស ឲ្យមានភាពស្រស់ត្រកាលឡើង។ ជាពិសេស អ្នក
ត្រូវតែចេះថែរក្សាទឹកចិត្តចៅហ្វាយនាយឲ្យមានភាពសប្បាយរីករាយជា មួយអ្នកផងដែរ។ នេះជាកត្តាមួយ ដែលអាចធ្វើឲ្យចៅហ្វាយមានអារម្មណ៍ស្និតស្នាលនឹងអ្នក ព្រមទាំងអាចឆ្លាក់រូបអ្នកដាក់ក្នុងបេះដូងគាត់ផងដែរ។ ដូច្នេះ រូបអ្នកនឹងក្លាយជាមនុស្សសំខាន់របស់គាត់ និងអាចទទួលបានឱកាសពិសេសនៅពេលគាត់មានតម្រូវការ ឬចង់តំឡើងប្រាក់ខែ ឬ ក៏ឋានៈដល់បុគ្គលិក ។
១. រកឲ្យឃើញពីតម្រូវការចាំបាច់របស់ចៅហ្វាយនាយៈ បើចៅហ្វាយមិនសប្បាយចិត្ត ដោយសារបញ្ហាអ្វីមួយ ជាពិសេស នៅក្នុងការងារការិយាល័យ ដូចជាពេលជិតដល់ពេលកំណត់នៃការងារណាមួយ អ្នកត្រូវប្រឹងធ្វើឲ្យអស់ពីសមត្ថភាពដើម្បីធ្វើឲ្យទាន់ពេលវេលា ។
២. កត់សម្គាល់អ្វីដែលអ្នក និងចៅហ្វាយមានដូចគ្នាៈ អ្វីដែលអ្នក និងចៅហ្វាយ មានដូចគ្នាដូចជា៖ “ចូលចិត្តបច្ចេកវិទ្យាថ្មីៗ ការទៅហាត់ប្រាណជាដើម” ។ ការសន្ទនាទូទៅ អ្នកអាចបង្ហាញចៅហ្វាយ ពីចំណុចប្រហាក់ប្រហែលគ្នារវាងអ្នក និងចៅហ្វាយបាន។
៣. យល់ស្របតាមចៅហ្វាយឲ្យបានច្រើនៈ បើអ្នកមិនយល់ស្របជាមួយចៅហ្វាយទេ គាត់នឹងមានទស្សនៈផ្សេងជាមួយអ្នក ហើយមានអារម្មណ៍ថ្នាំងថ្នាក់ជាមួយអ្នកជាមិនខានឡើយ ។
៤. មិនត្រូវរិះគន់ចៅហ្វាយនាយៈ នៅពេលចៅហ្វាយនាយ ហាមអ្នកមិនឲ្យធ្វើអ្វីមួយ ឬពេលគាត់ស្តីបន្ទោស ដោយសារធ្វើអ្វីដែលគាត់មិនបានប្រាប់ឲ្យធ្វើ អ្នកត្រូវរក្សាការទាក់ទងល្អជាមួយគាត់ ជៀសវាងការរិះគន់ ឬការតមាត់តសម្តីទៅវិញទៅមក ។
៥. រកឱកាសធ្វើឲ្យអ្វីមួយឲ្យកើតឡើងៈ ឧទាហរណ៍៖ “មានគម្រោង និងកិច្ចការជាច្រើន ដែលអ្នកដទៃមិនមានពេលវេលាសម្រាប់ធ្វើវា”។ អ្នកត្រូវស្ម័គ្រចិត្តធ្វើវា ហើយប្រឹងប្រែងធ្វើវាឲ្យបានល្អ។ នេះហើយ ជាមន្តស្នេហ៍ទាក់ទាញចិត្តចៅហ្វាយ ហើយចៅហ្វាយនឹងសរសើរអ្នក ព្រមទាំងចងចាំអ្នកនៅពេលអនាគតទៀតផង។
៦. ត្រូវធ្វើជាអ្នកគាំទ្រៈ អ្នកត្រូវតែគាំទ្រចៅហ្វាយជានិច្ច ទោះបីជាពេលខ្លះ អ្នកមិនពេញចិត្តនឹងអាកប្បកិរិយាចៅហ្វាយក៏ដោយ នេះមានន័យថា៖ “អ្នកមានភាពស្មោះត្រង់ជាមួយចៅហ្វាយ” ។
៧. សម្តែងការគោរពៈ ការគោរព ជារឿងមួយដែលមិនអាចខ្វះបាន ចំពោះចៅហ្វាយនាយ ហើយអ្នកអាចធ្វើបានដោយវិធីងាយៗ ដូចជា ការគោរពពេលវេលា ការធ្វើតាមតួនាទី និយាយដោយសុភាព ការបញ្ចប់ការងារតាមកាលកំណត់ និងមិនត្រូវនិយាយទៅកាន់គាត់ ពេលគាត់ជាប់រវល់។ ពាក្យចាស់តែងតែពោលដាស់តឿនថា៖ “ងើយស្កក ឱនដាក់គ្រាប់”។ នេះ គឺគាត់ចង់ប្រាប់ថា៖ “មនុស្ស គ្រប់រូបត្រូវចេះគោរពឱនលំទោន និងកោតក្រែង ព្រមទាំងចេះអធ្យាស្រ័យគ្នា ជាពិសេស នៅកន្លែងធ្វើការ អ្នកត្រូវតែសម្តែងការគោរពដល់អ្នកដទៃ ដែលធ្វើការរួមគ្នា ក្នុងគោលដៅរួមមួយ”។
៨. ធ្វើឲ្យចៅហ្វាយ មើលអ្នកនៅលើផ្លូវល្អៈ ការធ្វើឲ្យចៅហ្វាយនាយ ចាត់ទុកអ្នកជាមនុស្សល្អ គួរឲ្យទុកចិត្ត ក៏ជាវិធីសាស្ត្រដ៏ល្អមួយផងដែរ ហើយអ្នកអាចអនុវត្តតាមរយៈស្នាមញញឹមដោយភាពកក់ក្តៅ ការចុះសម្រុងជាមួយមិត្តរួមការងារ មានភាពស្មោះត្រង់់ចៅហ្វាយ ឬក្រុមហ៊ុន មិនកេងប្រវ័ញ្ចប្រាក់ក្រុមហ៊ុន និងធ្វើជាមនុស្សមានទស្សនវិជ្ជមាន។ ម្យ៉ាងវិញទៀត អ្នកគិតថា៖ “ជោគជ័យរួម ក៏ដូចជាជោគជ័យរបស់អ្នកដែរ” ។
៩. ជួយចៅហ្វាយៈ អ្នកត្រូវចាំថា៖ “ការជួយអ្នកណាម្នាក់ ជាការចាប់ផ្តើមឲ្យគេមានទឹកចិត្តសប្បាយរីករាយ ទោះតិចក្តី ច្រើនក្តី ជាពិសេស ការជួយដល់ចៅហ្វាយ។
១០. ចៅហ្វាយតែងតែមានគម្រោងផ្ទាល់មួយ ហើយគាត់មិនមានពេលសម្រាប់ធ្វើវា គាត់ទុកវាចោលៈ នេះជាពេលអ្នកត្រូវចូលមក ហើយចាប់ផ្តើមបង្ហាញពីស្នាដៃ និងទឹកចិត្ត ចេះជួយទុក្ខធុរៈ។ អ្នកត្រូវរកឲ្យឃើញថា៖ “គម្រោងនោះជាអ្វី ហើយអ្នកត្រូវចំណាយពេលទំនេររបស់អ្នកទៅបំពេញវាឲ្យបាន” ។ បន្ទាប់ពីអ្នកបានបញ្ចប់វាបានរួចរាល់ហើយ ចៅហ្វាយនឹងស្រឡាញ់ ពេញចិត្តអ្នកជាក់ជាមិនខាន ។
អំពីអ្នកនិពន្ធ
Admin
ខ្ញុំបាទ ផាន់ ចាន់រិទ្ធី ជានាយកមជ្ឈមណ្ឌល ម៉ាយស្កូល សូមទទួលនូវរាល់មតិកែលំអរទាំងឡាយណាដែលកើតមានឡើង ឬក៏ចំនុចខ្វះខាត សំណូមពរនានា ឬក៏ចង់បំពេញបន្ថែមដើម្បីឲ្យទំព័រមួយនេះមានភាពល្អប្រសើរឡើង។សូមអរគុណ
0 សេចក្តីអធិប្បាយ:
Note: Only a member of this blog may post a comment.